بنات يا له فيدونا بخبراتكم في التجارب المنزلية ...

كلشي ولات عندو مكينة الصابون الحمد الله تهنينا من عدابو ...

اشمن صابون كتستعملو و لقيتو فيه راحتكم ..يعني مكيكشفش الحوايج و تيخرجو يا سلام ..

في البداية كنت خديت ماكينة الصابون العادية ..صراحة مشيت غالطة مع كلام الناس ..كانت عندنا في الدار و كانت امي الله يحفظها هيا لي كتخدمها دايما ...
ملي شريتها جيت مع الموجة ديال الفوطوكوبي ههههههههه الدوزييم شوا ...
مصدقاتش ليا ..خرجات ليا على الحوايج بزاف ...الحمد لله شريت lg الاوتوماتيك لي ولاو جداد ..و التصبين ماشاء الله فرق كبير في كلشي ..
كنت كنستعمل اومو ماتيك شوية رجعت لارييل ...لكن سمعت الناس تيقولو كيكشف ..
واش بحال هاد الماكينات نقدر ندير فيهم الشمبوان ..
واحد السيدة قالت ليا كتصبن دايما حوايج ولادها بشمبوان ديال الشعر ..و دايما حوايج ولدها ..بحال الا عاد شراتهم ليهم ...و الناس كيسولوها على السر ..

واش كتديروا الخل لماكيناتكم باش تحيدو الكالكير ...

شاركونا حبيباتي بخبراتكم

انا اللي كانعرف ماكينة الصابون ماخصكييش تبدلي ليها المسحوق اللي كاتصبني بيه بقاي تصبني بيه باشما تخسرش
وكانعرف تاني حويج الدراري الصغار كانحكو عليهم صابون الحجرة وندخلهم للماكينة على درجة حرارة 90°
انا الشمبوان عمرني جربتو شمبوان كانجربو فالزرابي و الكواش كايرجعهم وااااعرييين و الريحة فنة

شكرا على طرح الموضوع

حتا انا كنشري شامبوان الزرابي ..و الكواش كنت كنصبنهم في المصبنة لكن للاسف مبقاش كيقنعني تصبينهم ..كيجيني بحال الا غير علقوهم يضربهم البرد ..
واش صابون الحجرة مغاديش يخسرها ..و نديرو غير بوحدو ..
كاينة في الماكينة بروكرام تصبين حوايج الصغار

اه عرفت وولكن انا كاندوي ليك على البرودوي ديال ارييل بحد داتو يقدر يضر ليك الجلد ديال الطفل
كاتشدي الحوايج ديول الاطفال فزكيهم حكي عليهم صابون الحجرة
و ديريهم فالماكينة على تصبينة وحدة
ماديري فيها والو لا مسحوق لا حتى حاجة

أنا تنستعمل أوني أو أومو أما أرييل راه تكشف ألوان
الشمبوان الشعر ما عمرني ايستعملتو . كاين شمبوان خاص بماكينة الصابون الاوتوماتيك غير تيعطر الحوايج و خل فيهم رويحة زوينة.

الشمبوان انا كنغسل بيه العبايات لانه اللون ما يكشفش وحتى طوموبيلتي كنغسلها بالشمبوان ههههههه
بالنسبة للصابون الي عجبني للماكينة بونكس نظافة ريحة توفير
وبصح اومو عندنا هنا هوا وتيد مجهد كيكشف بحال جافيل ينفع غير للكنادر الرجال البيضين

شكرا على المعلومة حبيبتي ..عنداك الحق ارييل مجهد حتى على حوايجنا ...
انا كنت شفت واحد السيدة في برنامج يمكن اجيو نقتاصدو ولا معرفت اش سميتو ..كتدوب صابون الحجرة و تديروا في الماكينة

شكرا حبيبتي على المشاركة .




يا رب تفيدكم تجربتي مع صابون الحجرة
طريقتي اليوم ساااااااااااااهلة
و هي باش تصبني في الماكينة بصابون الحجرة
بلا متحتاجي تحكيه حيت منين تتحكيها و ديريها في الماكينة غير تدور الماكينة و نزل الماء الصابون تيتجمع في بلاصة وحدة و بعد المرات متيدوبش لهدا بغيت نزل هاد الطريقة حيت عملية أكتر و سهلة

الطريقة سهلة كيف قلت يكفي تشدي الصابونة الحجرة



و تقطعيها صريفااات صغااار بالموس



و ديريها فشي حك خااص و زيدي عليها الماء و خليها فيها حتى تدوب فيه و تتولي على شكل كريم



و ممكن تستغلس حتى طريفات الصابون اللي تتشيط ليك في الحمام و الدوش و تزيديها في ديك الحك و هكدا تتستغليها في الصابون



ملاحضة راه الصابونة خاصها الماء كتير باش تتدوب كاملة لهدا أنا درت غير طاسة صغيرة منين تنهز منها الصابون اللي يقدني تزيد عليها الماء



صانونة وحدة تتدي لية بزززااااف و كيفية الاستعمال يابنة تنشد كريم الصابون و نتديرو في بلاصة مسحوق الصابون كراس أول و الراس التاني تندير فيه المسحوق الخاص بالماكينة





و ممكن العكس انت و حسن الاختيار ديالك

اميرة واش السلطان جا ولا باقي هههههههههههه دابة انتي راكي الضرة لووووووول
الصابون عليك من هنا نفرقو المهام

amal123 كتب:الشمبوان انا كنغسل بيه العبايات لانه اللون ما يكشفش وحتى طوموبيلتي كنغسلها بالشمبوان ههههههه
بالنسبة للصابون الي عجبني للماكينة بونكس نظافة ريحة توفير
وبصح اومو عندنا هنا هوا وتيد مجهد كيكشف بحال جافيل ينفع غير للكنادر الرجال البيضين

اهلا بالغالية .
مهلية في الطوموبيل معندي منتسالك هههههههههه...فعلا الشمبوان تيقولو تيخلي الالوان زاهية و منورة ..
تيد حتا هوا مجهد ..و بونكس منظنش واش عندنا ديال المكينة ..
كنت جربت اوني ديال الماكينة و الله الا غزال ..ساعة مبقيتش كنديروا لانو كنلقاه مقطوع بعض المرات

أميرة كتب:أنا تنستعمل أوني أو أومو أما أرييل راه تكشف ألوان
الشمبوان الشعر ما عمرني ايستعملتو . كاين شمبوان خاص بماكينة الصابون الاوتوماتيك غير تيعطر الحوايج و خل فيهم رويحة زوينة.

اهلا امورة ...اوني زوين لكن مكنلقاهش دايما ..
يمكن نعود ندير شمبوان الشعر في الماكينة وخا خايفة لنخسرها ..
هداك المعطر كنت كنشريه و نديرو في البلاصة المخصصة ليه ..لكن قريت بانو كيخسر الماكينة و الله اعلم

mohera كتب:كلشي ولات عندو مكينة الصابون الحمد الله تهنينا من عدابو ...

اشمن صابون كتستعملو و لقيتو فيه راحتكم ..يعني مكيكشفش الحوايج و تيخرجو يا سلام ..

في البداية كنت خديت ماكينة الصابون العادية ..صراحة مشيت غالطة مع كلام الناس ..كانت عندنا في الدار و كانت امي الله يحفظها هيا لي كتخدمها دايما ...
ملي شريتها جيت مع الموجة ديال الفوطوكوبي ههههههههه الدوزييم شوا ...
مصدقاتش ليا ..خرجات ليا على الحوايج بزاف ...الحمد لله شريت lg الاوتوماتيك لي ولاو جداد ..و التصبين ماشاء الله فرق كبير في كلشي ..
كنت كنستعمل اومو ماتيك شوية رجعت لارييل ...لكن سمعت الناس تيقولو كيكشف ..
واش بحال هاد الماكينات نقدر ندير فيهم الشمبوان ..
واحد السيدة قالت ليا كتصبن دايما حوايج ولادها بشمبوان ديال الشعر ..و دايما حوايج ولدها ..بحال الا عاد شراتهم ليهم ...و الناس كيسولوها على السر ..

واش كتديروا الخل لماكيناتكم باش تحيدو الكالكير ...

شاركونا حبيباتي بخبراتكم

باش تحيدي الكاكير من ماكينة الصابون ديري طانك ديال الحامض في 1 لتر الماء أو كبيه في الماكينة دوريه واحد الشوية أو خوي الماء ره قال ليك كايحيد الكالكير راه قالها ليا واحد المعلم لي كايصاوب الماكينات

amal123 كتب:اميرة واش السلطان جا ولا باقي هههههههههههه دابة انتي راكي الضرة لووووووول
الصابون عليك من هنا نفرقو المهام

ههههههههههه
نصبن و نخبز ما تكوني غير على خاطرك
والضرة ممكن تكون في متابة الأخت إلى كانت القلوب متسامحة و عامرة بالحب و الخير بعيدا عن الشر و الأنانية. و لكن هيهات هيهااااااااااااااااات كل متوقف على السلطان

أمواج كتب:

باش تحيدي الكاكير من ماكينة الصابون ديري طانك ديال الحامض في 1 لتر الماء أو كبيه في الماكينة دوريه واحد الشوية أو خوي الماء ره قال ليك كايحيد الكالكير راه قالها ليا واحد المعلم لي كايصاوب الماكينات

شكرا ليك حبيبتي ..معلومة قيمة

انا كنستعمل برسيل للاالوان والشامبو للاسود والابيض كندير له برسيل ومع اضافه الملح للمسحوق كيرجعو ناصع وكيحيد البقع والاصفرار

شكرا حبيبتي عيون على المشاركة ..
واش الملح العادي كتزيديه على المسحوق

ملح كيكون فالسوبر مارشي مكتوب عليه ملح باليود كيخلي بياض ناصع تيدروح حتى للطعام

اه العادي لي كيتباع راه فيه اليود ..ولكن اشنو الهدف منو الا خلطناه مع المسحوق

للملابس البيضه كيخليها ناصعه ومتصفارش وخصوصا الى كانت مخزنه فالبلكار طول الشتاء والصيف ملي تجبديهم كتلقاي فيهم الصفورة او صداء اي حوايج فيهم الصداء كتحيدو الملح وخا الااوان او الرخام الزليج الملح كينقيه ويرجع ليه لونه الناصع او بقع بملابس الاطفال الي مكتزولش بالمسحوق جربي الملح ومنها كتنقي الغساله من الشوائب

ما شاء الله عليكي حبيبتي ..اكيد ان شاء الله غنجربها
شكرا على الافادة

الله يبارك فيك ويحفظك احبيبه والله يسر امورك ويسهل لك ولادتك يارب

مهيرة موضوع زوين هدا طرحتي غيفيد الجميع أنا نعطيك تجربتي والخلاصة جميع أنواع المساحيق جربتهم عندي ماكينة وييربول هادي 6 سنين باش شريتها مزال فنة وكتخرج لحوايج ولكن مسحوق واحد دبا تبث عليه هو skip صراحة غزآآال كيخرج لحوايج ولبويض مكنحتاج نعاودهم فجافيل والألوان مكتكشفش والريحة كتوصل حتى لعند جارتي ديما كتسولني أشمن معطر كنديرهههههههه وخا زايد شوية فالثمن على لمساحيق لآخرين ولكن يستاهل بصراحة

وحويجات لوليدات مديريش صابون لحجرة هكاك محكوك راه كيخنق الماكينة شدي صابونة ديال الكف بريحة الحامض وحكيها فحكاكة غليضة وخوي عليها 5 ليتر ماء طايب وحركيها بالضراب اليدوي حتى يدوب الصابون وهانتي عندك سائل صابون فيه 5 ليتر وخويه مع حويجات دراري نيشان بلاما تحطيه فبلاصة المسحوق ولمفهمتيش شي حاجة أنا هنا

بالنسبة للمانطات والزرابي كنصبنهم بجيل دوش هداك اللي كيتباع ب 10 دراهم ديال الشمال كناخد ديال الخوخ ولا ديال التفاح كيخرجهوم غزالين ورطبيييييييين والريحة كتحمق وفوق هادشي اقتصادي

فعلا فيروزه انا كنت نشوف حماتي كديرها ديما غير هي كطبخو شويه فوق النار حتى يعقد وتطفي عليه تبارك الله عليك الحادقه وربي يحفظك

الفيروزة كتب:مهيرة موضوع زوين هدا طرحتي غيفيد الجميع أنا نعطيك تجربتي والخلاصة جميع أنواع المساحيق جربتهم عندي ماكينة وييربول هادي 6 سنين باش شريتها مزال فنة وكتخرج لحوايج ولكن مسحوق واحد دبا تبث عليه هو skip صراحة غزآآال كيخرج لحوايج ولبويض مكنحتاج نعاودهم فجافيل والألوان مكتكشفش والريحة كتوصل حتى لعند جارتي ديما كتسولني أشمن معطر كنديرهههههههه وخا زايد شوية فالثمن على لمساحيق لآخرين ولكن يستاهل بصراحة

وحويجات لوليدات مديريش صابون لحجرة هكاك محكوك راه كيخنق الماكينة شدي صابونة ديال الكف بريحة الحامض وحكيها فحكاكة غليضة وخوي عليها 5 ليتر ماء طايب وحركيها بالضراب اليدوي حتى يدوب الصابون وهانتي عندك سائل صابون فيه 5 ليتر وخويه مع حويجات دراري نيشان بلاما تحطيه فبلاصة المسحوق ولمفهمتيش شي حاجة أنا هنا

ما شاء الله عليك حبيبتي ..انتي هيا امنا لدايما معها الجديد و المفيد ..
هداك المسحوق سكايب ..كنت كنديرو في الماكينة العادية لكن مع كانت عيانة مكان تيبان ليا فرق ..
دابا عندي مخزون من مسحوق ارييل مكيلة منو ..تقولي غيسالي ههههههههههه
واش واخا نشري سكايب و نخلطو معاه او مرة نديرو مرة ندير الاخر ..

الفيروزة كتب:بالنسبة للمانطات والزرابي كنصبنهم بجيل دوش هداك اللي كيتباع ب 10 دراهم ديال الشمال كناخد ديال الخوخ ولا ديال التفاح كيخرجهوم غزالين ورطبيييييييين والريحة كتحمق وفوق هادشي اقتصادي

نفس مكتدير بنت عمتي ..
شكرا على الفكرة

تبارك الله على الحداكة حنا في الدار تنديرو امو ماتيك ولكن شفت واحد السيدة في التلفزة دارت الصابون ديال الكف في الكاكة ديال خيزو حتى نزل رقيق وزادت عليه ماء طايب قالت كتخليه ثلاثة الايام وتديرو في الماكينة ديال الصابون هي قالت الحوايج تيطلعو ناصعين وما يكشفش اللوان واقتصادي وصديق للبيئة ولكن انا مع النعاس عمرني ما جربتو
تبارك الله على مهيرة على الطرح المفيد وشكرا للحبيبات اللي فادونا بالتجارب ديالهم

شكرا ليك حبيبتي على المشاركة ..
حتا انا كنت شفتها لكن مزعمتش ..
و بالنسبة لامو حتا هو مبقاش مريحني ...بغيت لي مياترش على الالوان

شكرا الاخت مهيرة على الموضوع انا كندير اومو ماتيك و موافقني كيخرجو الحوايج نضاف و بيضين لكن زدت معلومات من عند الاخوات خصوصا المسحوق ديال الفيروزة دابا نجرب ان شاء الله كذلك و صفة الاخت مها ما عندي منسالها عمري ما في خباري ان الملح كينضاف لمسحوق الغسيل

الصراحة ماخليتو لي مانقول الحادكات .أنا الزرابي والكواش كنصيفطهم للمصبنة والمسحوق ديال الغسيل ملي كنمشي نتقدا الماركة اللي لقيتها قريبة ليا كنهزها ونهني راسي هههههههههههههههه كيجيتكم الحداكة والتدبير .

fati-fleur كتب:الصراحة ماخليتو لي مانقول الحادكات .أنا الزرابي والكواش كنصيفطهم للمصبنة والمسحوق ديال الغسيل ملي كنمشي نتقدا الماركة اللي لقيتها قريبة ليا كنهزها ونهني راسي هههههههههههههههه كيجيتكم الحداكة والتدبير .

اهلا الزين الشرقاوة الحرار كلهم حادكين ما عندي منكول فيهم كلشي جامعينوا ماشاء الله

mohera كتب:

الفيروزة كتب:مهيرة موضوع زوين هدا طرحتي غيفيد الجميع أنا نعطيك تجربتي والخلاصة جميع أنواع المساحيق جربتهم عندي ماكينة وييربول هادي 6 سنين باش شريتها مزال فنة وكتخرج لحوايج ولكن مسحوق واحد دبا تبث عليه هو skip صراحة غزآآال كيخرج لحوايج ولبويض مكنحتاج نعاودهم فجافيل والألوان مكتكشفش والريحة كتوصل حتى لعند جارتي ديما كتسولني أشمن معطر كنديرهههههههه وخا زايد شوية فالثمن على لمساحيق لآخرين ولكن يستاهل بصراحة

وحويجات لوليدات مديريش صابون لحجرة هكاك محكوك راه كيخنق الماكينة شدي صابونة ديال الكف بريحة الحامض وحكيها فحكاكة غليضة وخوي عليها 5 ليتر ماء طايب وحركيها بالضراب اليدوي حتى يدوب الصابون وهانتي عندك سائل صابون فيه 5 ليتر وخويه مع حويجات دراري نيشان بلاما تحطيه فبلاصة المسحوق ولمفهمتيش شي حاجة أنا هنا

ما شاء الله عليك حبيبتي ..انتي هيا امنا لدايما معها الجديد و المفيد ..
هداك المسحوق سكايب ..كنت كنديرو في الماكينة العادية لكن مع كانت عيانة مكان تيبان ليا فرق ..
دابا عندي مخزون من مسحوق ارييل مكيلة منو ..تقولي غيسالي ههههههههههه
واش واخا نشري سكايب و نخلطو معاه او مرة نديرو مرة ندير الاخر ..

موهيرة حتى تكملي أريال اللي عندك متخلطيهمش بجوج أولا خلطي الما اللي غدوبي فيه صابونة الحجرة مع أريال غيخرجو لحوايج فنين شوية الاقتصاد العيالات هههههههه

الفيروزة كتب:


موهيرة حتى تكملي أريال اللي عندك متخلطيهمش بجوج أولا خلطي الما اللي غدوبي فيه صابونة الحجرة مع أريال غيخرجو لحوايج فنين شوية الاقتصاد العيالات هههههههه

ههههههههههه قفرتها يعني حتال العام الجاي ..
ولات فيا هاد القضية ..و كنعتبرها من باب الاقتصاد ..مواد التنظيف دايما كندخلها في تقدية مرجان الشهرية وخا تكون باقا عندي ..كنقول معلش راها مغتخسرش و مزيان يبقا فيها الخزين ..

اختي بغيت نسولك الماكينة فين كتحطي المسحوق ..واش في الصف الاول او التاني ..انا كانو قالو ليا في الشركة بزوجهم ..الاول نحط فيه كاس و التاني كاس و نص ..
و لكن كنشوف في العائلة هالي كتحط غير في الاول ..هالي كتحط في التاني

مغربية حرة كتب:شكرا الاخت مهيرة على الموضوع انا كندير اومو ماتيك و موافقني كيخرجو الحوايج نضاف و بيضين لكن زدت معلومات من عند الاخوات خصوصا المسحوق ديال الفيروزة دابا نجرب ان شاء الله كذلك و صفة الاخت مها ما عندي منسالها عمري ما في خباري ان الملح كينضاف لمسحوق الغسيل

الشكر ليك حبيبتي على المشاركة ..سكايب مؤخرا كيشكروه الناس خصنا نجربوه ..و طريقة الملح و الصابون الحجرة زوينة في الملابس الداخلية بصفة عامة

fati-fleur كتب:الصراحة ماخليتو لي مانقول الحادكات .أنا الزرابي والكواش كنصيفطهم للمصبنة والمسحوق ديال الغسيل ملي كنمشي نتقدا الماركة اللي لقيتها قريبة ليا كنهزها ونهني راسي هههههههههههههههه كيجيتكم الحداكة والتدبير .

فعلا المغربيات تحيري في تدبيرهم و نقاوتهم ..كلها و اسلوبها ما شاء الله ..
حتا انا بحالك الكواش دايما المصبة لكن ..ابدا واش باقي غنسيفطهم لانو مكيطربنيش داك التصبين الناقص ..بحال كان غير ناشرهم ..
اما الزربية ..الله ياخد فيهم الحق ..قبل منولد ديتها للمصبنة و ملي جابها و تفرشات ...بحال الا محروقة ..
معا هيا تركية و شعرها رطب ..ولا شعرها جكس ..و الله من تماك مبقا بان فيها الضوء في التصبين ..
و معرفت مندير ليها

فاتي ضحكتيني لقيت معاك الحل الصراحة هههههههههه اقرب واحد اوصافي الدنيا بخيييييييييير

الباب الأول كتحطي فيه كاس لكان عندك الحوايج نقيين راه كافي ولكانو مسخين كتزيدي كاس آخر فالباب الثاني حيث كيعاودو يتصبنو على حساب البروكرام والباب اللي فيه شبيكة زرقة خاص بجافيل ولا الملين


أنا كنكتافي بكاس فالباب الأول ومعمري درت فيها جافيل كنخاف نخرج عليها ونبقا بلاش ههههههه ا

بالنسبة للكالكير مديريش الما طايب بزاف فيها صبني بدرجة حرارة 30 ولا 40 كافية ومرة ف 3 اشهر خوي فيها ليتر ديال الخل البيض وخلليها دور بٱقل بروكرام خاوية

مهيره حبيبه ديال الصابون الكف محكوك مزيانه للاطفال مكديرش لهم حكه بالجلد بحال المساحيق اخرى انا كنت دايره لهم غساله الاطفال صغيره وعاديه كتصبنهم وانا كنشللهم ونشرهم زينه للجلد البيبي مخصوصا الملابس الداخليه

الفيروزة كتب:الباب الأول كتحطي فيه كاس لكان عندك الحوايج نقيين راه كافي ولكانو مسخين كتزيدي كاس آخر فالباب الثاني حيث كيعاودو يتصبنو على حساب البروكرام والباب اللي فيه شبيكة زرقة خاص بجافيل ولا الملين


أنا كنكتافي بكاس فالباب الأول ومعمري درت فيها جافيل كنخاف نخرج عليها ونبقا بلاش ههههههه ا

بالنسبة للكالكير مديريش الما طايب بزاف فيها صبني بدرجة حرارة 30 ولا 40 كافية ومرة ف 3 اشهر خوي فيها ليتر ديال الخل البيض وخلليها دور بٱقل بروكرام خاوية

شكرا ليك يا الغالية و الله فديتيني بزاف بزاف

عيون المها كتب:مهيره حبيبه ديال الصابون الكف محكوك مزيانه للاطفال مكديرش لهم حكه بالجلد بحال المساحيق اخرى انا كنت دايره لهم غساله الاطفال صغيره وعاديه كتصبنهم وانا كنشللهم ونشرهم زينه للجلد البيبي مخصوصا الملابس الداخليه

غنولي نديرها حتا لملابسنا الداخلية لانو جميل و طبيعي ..
شكرا ليك يا الغالية

mohera كتب:

fati-fleur كتب:الصراحة ماخليتو لي مانقول الحادكات .أنا الزرابي والكواش كنصيفطهم للمصبنة والمسحوق ديال الغسيل ملي كنمشي نتقدا الماركة اللي لقيتها قريبة ليا كنهزها ونهني راسي هههههههههههههههه كيجيتكم الحداكة والتدبير .

فعلا المغربيات تحيري في تدبيرهم و نقاوتهم ..كلها و اسلوبها ما شاء الله ..
حتا انا بحالك الكواش دايما المصبة لكن ..ابدا واش باقي غنسيفطهم لانو مكيطربنيش داك التصبين الناقص ..بحال كان غير ناشرهم ..
اما الزربية ..الله ياخد فيهم الحق ..قبل منولد ديتها للمصبنة و ملي جابها و تفرشات ...بحال الا محروقة ..
معا هيا تركية و شعرها رطب ..ولا شعرها جكس ..و الله من تماك مبقا بان فيها الضوء في التصبين ..
و معرفت مندير ليها

حتى أنا بحالك فالحمولية كنت كنسيفطهم للمصبنة كيجيوني لمانط ريحتهم بحال كريزين ومن بعد فالنفاس كنت كنجيب واحد المراة تصبنهم مللي كنوقف معاها كتصبنهم مزيان ولكنت مشغولة كدير ليهم شتف عيتف وتاخد لفلوس وتمشي وحلفت مباقا ندصر شي حد كنصبنهم لراسي كيخرجو كيحمقو ونقيين

بالنسبة للزربية ديالك شوفي ديري ليها صابونة لحجرة مذوبة فلما سخون وحكيها بزلافة مقلوبة الشيتة كتشنتفها وكرطيها بالكراطة وعاودي حكيها ب سائل أوني لصفر و كرطيها وشلليها راه تخرج كتشعل

يا اختي فيروزة غنديرها ليها هاد الايام نيت ..
عرفتي ولات حالتها بغيت غير نعرف اش دارو ليها ...
حتا نتي بحالي انا معكازة و لكن الا نضت كنوض عجاجة ..
و مكيعجنيش التنظيف الناقص ...كانو يسميوني في الدار بونظيف ..لكن ملي تزوجت تظربت مزيان بالهم ..و كنت غير خبز ربي في طبقو ..
كانو الدموع و الغوات ميسليوش مني ..
الحمد لله دابا نضت على رجليا من بعد مكنت غارقة في الياس ..

موضوع مزيون انا كنستعمل اريل عادي ديال التصبين بالمكينة ومن بعد في التشليل كنزيد ليها dal via


ريحتو غزالة كتخلي الحوايج مزيونين بزاف والزرابي معمري صبنتهم ماما مسكينة اللي تصبن

شكرا بالوما على الطلة ...
كنت كنستعمل معطر اي ماركة ماشي مهم ..لكن قريت انو كيخسر الماكينة و الله اعلم

وي ازين تشوفي انا في الشغال ولا نعرف والله وطياب هيداك شوية وصافي

وعائلة راجلي تبارك الله عليهم بناتهم الحداكة وانا والو ديما يعايرني بيهم

عيون المها كتب:مهيره حبيبه ديال الصابون الكف محكوك مزيانه للاطفال مكديرش لهم حكه بالجلد بحال المساحيق اخرى انا كنت دايره لهم غساله الاطفال صغيره وعاديه كتصبنهم وانا كنشللهم ونشرهم زينه للجلد البيبي مخصوصا الملابس الداخليه

بصاح عيون لمها أحسن منظف لحويجات الوليدات هو صابون الحجرة أنا كنزيد معاهم البيكاربونات كيعقموهم أفضل من جافيل ويخرجو نقيين

paloma blanca كتب:وي ازين تشوفي انا في الشغال ولا نعرف والله وطياب هيداك شوية وصافي

وعائلة راجلي تبارك الله عليهم بناتهم الحداكة وانا والو ديما يعايرني بيهم

ديري بحالي ان شاء الله غنشري فروج و نغسل يدي بالخصيات دياولو ..قالو تيدير البنة في اليد ..
نديرو النية و نتوكلو على مولانا ..
حتا عائلة راجلي ما شاء الله طياب امو روعة

الفيروزة كتب:

عيون المها كتب:مهيره حبيبه ديال الصابون الكف محكوك مزيانه للاطفال مكديرش لهم حكه بالجلد بحال المساحيق اخرى انا كنت دايره لهم غساله الاطفال صغيره وعاديه كتصبنهم وانا كنشللهم ونشرهم زينه للجلد البيبي مخصوصا الملابس الداخليه

بصاح عيون لمها أحسن منظف لحويجات الوليدات هو صابون الحجرة أنا كنزيد معاهم البيكاربونات كيعقموهم أفضل من جافيل ويخرجو نقيين

حتا هادي نديروها ..البيكاربونات موجودة

تبارك الله عليكم

تبارك الله عليكم الحادكات وشكرا موهيرة على الموضوع انا تنستعمل السكيب للمكينة اوتوماتيك تندير القياي ونعمل معاه شوية من مسحوق فانيش وفجهة ثانية قياس الغلاقة ديال سائل فانيش وهو جافيل ديال البيض والالوان الريحة كتعطعط فالحويجة فنيييييين والنظافة خلاص والى كانت شي بقعة صعيبة نحط عليها ديركت سائل فانيش ونخليه شوية ونلوحهم يتصبنو وحتى ستيلو حايد من الحوايج

انا كندير امو متك ولكنو لحوايج موسخين ديري كاي زول لما ميسخ وكمال بماء جديد باش لحوايج ميدوروش فلما موسخ
هدك لعبة ديال زلفة قتلتني كندير شيتة صغيرة مان بعد من خلي زربية ترطاب كنت نجيب لصبن وجننتني ههه

موضوع زوين ومفيد صراحه انا تنستعمل سكيب غزاله ريحتو تتحمقني واخه بوحدي راني حادكه هههههههههه تبارك الله عالحادكات دياولنا