لبنات بغيت نبدا شي ريجيم

لبنات شكون الي عندها شي تجربة مع شي ريجيم ناجح الصراحة بغيت نرجع لوزني الاول كنت 64ماغاديش نقول ليكم انا دابة شحال

راني كنتسنى

كن كان الصوص كي داوي اى ختي أمل هيهيهيهي لمهم أنا وياك فالهوى سوى ولكن أنا دبى شوية مكايسة. أنا حيت عندي deplacement بزاف كنكل في زناقي. لمهم أنا لدايرة كان فطر صباح بشوفان و حليب خالي دسم و كانقطاع فيهم تفاحة كان بقى شبعنا نهار كلو و ملي كان تغدى كنكل سلطة كنشبع ولكن إلا فطرت بالخبز ما كتكفنيش سلطة. و قهوة كحلة مسوسة مع صباح حتى هي تقفل شهية. و كنخد 30 ج ديال شوكولات الأسود خاص يكون 70% ديال كاكو من دون سكر مع 4h معه شي فاكهة وحدة بأستنأ البنان. لعشاء كندير حساء ديال خضار و 2 دانون خالي دسم خالي سكر. و إعتمد على لحوم البيضاء نسي لحم لحمر ما كيتهدمش داغية و نسي شي حاجة سميتها الخبز و بطاطا و عطي تساع لأي حاجة فيها سكر. 2 لتر ديال الماء يومياً هادي بحدها تحيد لك كلو و نص فالأسبوع . و نص ساعة رياضة يومياً ولو على مراحل متقطعة. المهم تحرك باش الجسم ديالك يبدا يحرق. و خا غير تشطحي او ما تبقيش بلاش. و شربي زهروات أنا كندير after meal ديال لبتون. و خصك طن ديال الإرادة و صبر .أنا كان حول نطبق شحال ما صديت ولكن مع الخدمة و سفر كان ضرب و نزجل ولكن وخى هكاك حسيت بالفرق .و الله يوفقك ونتمنى نكون فدتك

فدتيني حتى انا حيت من 64 ولات فيا 72 و انا غير قصيورة
شكرا

شكرا نادلينا ولكن راه هاديك الارادة الي للاسف ما كايناش انا عندي مشكله اسمها الادمان على النشويات الا ما كلتش الخبز تجيني البكية ويطيح عليا الضيم ههههه
مريومة اش بان ليك نبدا انا وياك ريجيم ونبقاو كل نهار تقولي ليا شحال طيحتي
انا فكرت في ريجيم البروتين كيقولو مزيان غير خاص ما تستمريش عليه بزاف ومن تبغي توقفيه لا توقفيه مرة واحدة يعني تبداي دخلي الخضرة والنشويات شوية بشوية
انا بعدا راني مقفراها خاصني نزل شي ٩كيلو

اويلي سكتووووووووووووووووو ماتهضرووووووش على الغلظ ملي تزوجت وليت شووووهاااا
انا بديت نتريني السبت و الاحد فالغابة و ماكانتعشاااش كاندير كاسكروط ونخرجو انا وراجلي ندورو كنجيو ونعسو

امال مخاصمة معااااك

امل قراي اكتر علا هاداك ديال لپروتينات، حيت دات كاتحرق لدهنيات ولكن كايتولد نقص فبزاف ديال لمواد لي محتاجاها دات
انا ماشي من عشاق لخبز، ولكن لفريت و لموناضة خارجين عليا
علاش مانجربوش:
كينفيقو: 2 كيسان ديال لما (انا مانقدرش عليه دافي) او كاس ماء دافي فيه ملعقة عسل حر
فطور مزيان، بحبوب شوفان و حليب خالي الدسم و قهوة بدون سكر وكيوي اوليمونة
مع 10: تفاحة
لغداء: والو بابو
سلطة مشكلة علا حساب لموجود، و طبعا ماشي بزاف ديال بطاطا ولا بزاف ديال لروز
بيبي او حوت او كبذة دجاج، طبعا ماش مقلية فزيت
و بلاش من ديسير
شربي قهوة مسوسة
مع 16ه كولي تفاحة
مع 19ه: دانون مسوس والا جاك جوع عصير فواكه بمكسرات و لكن بدوب بنان و كمية معوولة
إش بان ليك ا امولة و كل نهار نقولو اشنو كلينا و كل وحدة توعض لاخرى

ههههه مريامتي هاد البروكرام الي عطيتيني راني غادي نعضك مش نوعضك هههههه

اوكي اوكي غير تنضحك نبداه من غدا غادي نحاول نبداه ونكتب ليك اشنو كلت

حيزبزنة واش تصطيتي علاش تخاصمي معاية والله الحبيبة الا الله الي عالم بيا غير مع الشطون والدار كنوجد باغية نرحل لدار جديدة وتالفة راني غير كنطل ونهرب وحتى السكايب راه محلول غير بوحدو حتى الوالدة مابقات تلقاني كبري عقلك احبيبة راكي عزيزة عليا بلا ما نقول ليك
او ردي بالك من الغلض وضعافي راه الا حملتي غادي تمحني

hta ana zidoni 3likom rja3 fiya 80 kilo ana ktar minkom kamlin hhhh chofo chi rejim nbdwah kolna o3andi wahd lala molati krach t9ol hamla

بالوما بداي الريجيم الي كتبت مريومة نحاولو علاش لا انا بديتو هاد الصباح

لبنات مانساوش شرب لماء بكترة
بالنسبة للقهوة بلا سكر وإلا كنتو من محبي الشاي، من الافضل ماشي مع لماكلة و ماشي حلو بزاف(ههه مستحيل نشربو مسوس واخا يقولو ليا شربيه و تهودي 20كg، نقول خليو ليا كيلوواتي راه ماشرب إلا لحلاوته)
إوا امولة، اش دايرة للغداء، انا باقيا ليا صوبة ديال لخضر و عندي شوية دجاج دايرا لو غير زعتر و ازير و تومة، عادي نفرش ليه بصلة و ندير زويتة بلدية نرميه فلفرن و ارا برع بدون بابو!!!

صافي دبى اى أمل ولا سميتورجيم لي قالت لينا مريامتي وعقلي فيها

نادلينا علاش هههه لالالا لانه فيه شوية ما يتكال داكشي الي قلتي لينا انتي صعيب اصاحبتي وسمحي ليا والله ماقصدت غير شفت البرنامج ديالها فيه ما يتكال هههههه ختك بطينية

مريامتي البارح ما كتبتش اليوم غادي نقول ليك اشنو فكرت بليبوت شاي مع شوية الحليب بلا خبز لا والو
مع العشرة درت بيضة اومليت بالزيت البلدية
والغذا ما كلت والو بقيت شبعانه
وباقي ما كلت والو بالليل غادي ندير حسوة ديال الشوفان بالبصلة والعشوب وحبرشاد كنحماااق عليه وممكن ناكل شي تفاحة ولا بوعويدة المهم الله يصبرني وما نوض ندير هجوم على الخبز هو الي خارج عليا

بعدي مني صافي تقلقت عطيني جلابيةي نمشي بحالي. اى وتقول واش نزيد معك شي دقيقة. إلى حسيتي بجوع سري نعسي ولفي راسك نعاس بكري حيت كل ما بقيتي فيقا كلما غا تبقي تشعري بجوع. و ما تجي فن تدظ سيمانة حتى غا تولفي تكلي شوية معدتك غا تصغار. لمهم حبسي الماكلة 2 سويع قبل ما تنعسي باش ما تخمرش لك فالكرش. و فواكه بليل حاولي تجنبيهم لأنهم فيهم سكر و بليل ما غديش تقدري تحرقه و غا يتخزن لك في الجسم ديالك .كل دجاج مع لعشاء بلا جلدة

نادلينا الا تقلقتي انتي غادي نزيد نتفقس وناكل ونغلاض وتكوني انتي السبب ونقول نادلينا الي غلضاتني ههههه
حبيبتي ربي ما تقلقيش
وفعلا موضوع الفواكه اول مرة نسمعها كناكل زعما راني دايرة الريجيييم هههههههههههههنقول غير ديسير فيه غير الماء
ياربي نضعاف شوية تعقدت من راسي حوايجي مابقاو يجيوني

لا هنية اى زين غير بغيت نشد فيك . شوفي ما صعبة غير البديا و حتى إلى غشيتي ما يهمش اللهم تغشي شيوي ولا تحيديه في خطرة

شوفو انا راني لما تنتفقص تنتنفخ لكن بديت نعمل ريجيم اللبن و التمر 3 ايام خو 7 تمرات مع كاس اللبن في الفطور و بحالو في الغدا و العشا راكم تنزلو 2 حتى 3 كيلو في في 3 ايام خدو راحة يوم و بداو تاني راه زوين لكن العزيمة حتى توصلو للوزن لي بغيتو راه هذا الرجيم الوحيد لي نفعني من كل الرجيمات و لي فيها كوليسترول تاخد ملعقة زريعة الكتان في الصباح و في المسا راها زوينة

نادلينا انا راني الا غشيت كنغش بزااااف ههههه

لامارا حبيبه انا سمعت بيه هاد الريجيم لكن كيقولو الا وقفتيه كيرجع وزنك اضعاف هادشي الي قريت عليه بالنت

هو ديماً رجيم ال-قاسح كي رجع على دات حيت كتدخل الجسم ديالك في مرحلة تجويع و كيبدة يخزن كتر. بحال إلى ضرباتك الزلطة كي ولي ريال لي جا تجمعيه بحال هكاك الجسم إلى دخل مرحلة تجويع كي ولي يخزن طاقة كلها و ما كيحرقش. ال-حل هو تغديه تغدية متوازنة و كل ٣ ساعة تقولي شي حاجة باش ما يهبطش لميتطابوليسم ديالك . مع مراعات صحة نفسية حيت إلى حرمتي نفسك بزاف غا يجي واحد ال-وقت و تهيجي . من ال-أحسن ديري ٢ مرت في سمانة تكلي وجبة وحدة كتعجبك و نهار في ١٥ يوم تاىكولي فيه كيف بغيتي لأنه رجيم في صراحة هو علاج للإدمان و إدمان الأكل أصعب إدمان حيت ما يمكنش لينا نمتنع عن الأكل أو نعيش بلا به هاد شي علاش خصك تعودي نفسك بشوية بشوية على الأكل صحي

زائد عمرك تسناي نتائج في مدة قصيرة ديري في بالك أنه غا تبان نتيجة في ٤ أشهر أو ٥ . نتائج قصيرة المدى كتجي بزربة و تمشي بزربة زائد انها كتسبب الاحباط ديري في بالك أنه كتدري تغيير جدري و غا تودعي الكليات زايدة في مرة و هاد شي كيبغي ال-وقت إو لبغى الزين يصبر لرجيم

كلامك صحيح نادلينا ماة بالمأة انا من الناس الي كيجيني الاحباط والغبينه من نبدا شي ريجيم بحال الا حالة اكتىاب الله ينجيكم منه عاد كنولي نفكر في الماكله بزاااف وناكل اي حاجه خصوصا انه نمط حياتي تغير بعد ولادتي الاخيره وليت جالسه في الدار ما كتخرج غير تناكل ههههه من الملل التلفزيون والماكله

هى فن عواجت الفقوسة. نتي دبى عندك حالة فراغ . لازم و ضروري تشغلي وقتك شوفي شي هواية مارسيها ولا شي جمعية لأنه الفراغ غا يسبب لك لحماق.

هوا فراغ ومش فراغ المشكله انه كاين ما يدار وانا الي ماباغيه ندير والو معكااازه هههههه وبزااااف انا حتا في فتره فكرت ندير شفط لكريشه نتفك منها لكنه الراجل قال حتا تكملي ليا فريق الكوره الي باغي يولد شكون الدكاتره الي كتسمعي عليهم في المغرب مزيانين في كازا ولا الرباط غير ناخد فكره ربما تشفط بوها ونتهنا من الريجيمات

انا راني درت فراسي غادي نقص و لاباس
غادية مزيان و كيف قالت لاخت مرة مرة ديري خاطر لنفسك
لبارح مشيت لكازا و سمحت لراسي ناكل Gلاص ديال ماكدو واخا غنية ولكن راني موراها ماكليت والو حتى شربت كاس حليب و نينيت و تانحس براسي غادية ف طريق صحيح، و ماتانقويش من اخد لوزن كل دقيقة، درت فراسي سيمانة عاد نتوزن و غدا غادي نمشي نشوف شحال طيحت، إلى ماطاح والو نطيح بكريز!!!!!
اللهم يسر

إوا من 77 ل 75.600 والله إلى فرحت بحال إلى زادوني فلمانضة
إلى لامام، غادي نبقا غديا على هاد لمنوال
courage لبنات
و ديما شعاري والو بابو!!!

lbnat jrbaat wasfa tyhtli 4 kilo bla rejim walah hiya sknjbir + 9irfa + lymon okaymon fma skhon tbytihom lil kolo odiman 9bal akl b20 min chrbhom

daba wila fiya 76 walah

مبروك عليك مريامتي بونكوراااج
بالوما ردي البال هادشي الي كتشربي الا كنتي ناويه تحملي راه ينزل ليك لحمل في الاشهر الاولى لانه سخون ردي البال
انا نزلت جوج كيلو غير نقصت الخبز ومابقيت نتعشا بالليل الا جاننننني الجوع ناخد شي تفاحة الجوع المفرط ههههههههه كله يهون عشان الرشااااقه

بون كوراج ألبنات مزيان تفكرو فالرجيم أنا بعدا مكنقدرش عليه والو دغيا كنمل غير نبداه أسبوع ونحبس كيجيني جوع الدنيا والدين وقررت منتبع حتى رجيم ولكن ناكل أكل صحي ونبعد شوية على لحلويات والنشويات ومنتعشاش معطلة على الأقل ثلاث ساعات قبل النوم والخبز غير فصباح كناكلو صافي وشوية رياضة فالدار حيث راس البغل مخلانيش نخرج نتمشا كالك حتى يكون معايا هو وهو ممساليش يعني فهمي راسك وجري فدارك ههههههه

الله يكمل البنات الضعف زوين تتحسي راسك خفيفه ولكن الجوع ولد الحرام وانا بحالك امول عزيز عليا الخبز دابه ما متبعه والو ولكن قبل كنت تنشرب خل التفاح ملعقه كبيره مع نص كاس ما دافىء ونشربه قبل الاكل بساعه ومن قبل خل التفاح كنت ناكل ملعقه زريعة الكتان مطحونه قبل الاكل بساعه او نص ساعه وفالليل كنت نشرب كاس بمبلومورس العشا ما كنتش نتعشا تنصبر ولكن مره مره كنت ناكل بره الجوع ما يشاور ولكن احسن شي هو خل التفاح البلدي بالتوفيق البنات

hhh chokran amola had sa3a akhtyi makayin walo wakha w9aft kina had ch7ar mahmlatch had sa3a inama ndir fhalik mziwna had fikra mant3chawch hhh ana baghya nd3af hit wlit kanban kbira hhh

السلام عليكم الاخوات نتمنى تكونو بالف خير راني توحشتكم بزاف و الله القسم دائما في بالي .اختي امال لباس عليك كيف دايرين وليداتك مبروك العواشر عليكم .بالنسبة للريجيم حاولي تنقصي من السكريات شربي القهوة و اتاي و العصير بدون سكر. و نقصي الخبز و الملح و كولي عادية .لكن بالليل خودي يغورت طبيغي مسوس مع الثمر و نعسي مرتاحة .هذا هو ريجيمي الحمد لله كنزل من وزني بسرعة و حاولي تشربي الماء مزيان نتمنى نكن وصلت لك و الله يخلي لك صحيحتك تهلاي في راسك

فيروزة والجري في الدار حتى هوا زوين لا تسولي على الجري في الدار هههههه الله كريم اشنو نديرو

مغربية حبيبة سول فيك الخير فين غبورك والله حتى عيقتو واااه خليتونا ندورو غير بوحدنا هنا
وليداتي الحمد لله بخير ماولفوش ليا المدرسة ما عجباتهمش نهائيا وراني كنحزر اوصافي كل نهار ما يمشيو حتى يبكيو الصبر اوصافي
بالنسبة للريجيم راني كنتشاور باقي ما بديت شي حاجة جديا احتمال تكون شي حاجة في الطريق حتى نتاكد ونطلقكم للفراجة هههههههه