البنات راني مريضة دخلو فيدوني

هادي 3 ايام وراسني مزير علي وكتشدني سخانة وتمشي بوحدها وفالليل كتجيني بحال تبوريشة وكنتغطى حتى كنعرق ومللي كنبغي نسجد فالصلاة مكنقدرش نحط جبهتي للأرض بحال شي حاجة كتحول من قلقولتي لجبهتي ونيفي بحال الضو كيضرب فيه معرفت واش هدا برد ولا شنو ؟ اللي عندها شي وصفة تفيدني راني وليت غير معصبة

ما يكون عندك باس
هذا أكيد غيرالبرد حاولي أن تأخدي دوليبران و رينوميسين
الله شافيك

labas 3lik a zin imkan gi lbard

labas 3lik khodi doliprane allahiychafik

مايكون عندك باس الفنون غير البرد راه هاذ الاعراض اللي قلتي دازت من قبل عليا من الاحسن تمشي عند الطبيب الله يجيب الشفا

الله يشافيك افيروزتي حبيبة
ياكما حاملة؟؟

لهلا يوريكم باس حبيباتي أميرة وحسينة وريم ولالة حبي وفانة وناتي الغزالات بصح البنات هادي أعراض البرد دخلني مزيآآن وزيرني من الراس درت البارح الوصفة دلخزامة وزيت العود ونحمد ربي شوية وخديت دوليبران وعرقت فالليل بعدا وليت نقدر نحط جبهتي للأرض أما الطبيب مكنحملش نمشيلو قوة الدوايات بلا فائدة

لالة حبي على سلامتك الزين فين غبرتي؟ ولدتي ولا مزال؟

الله ياناتي لحبيبة أش بغيتي عندي راني دايرة إضراب على لحمل
4 لوليدات الله يجعل البركة ويرفد ربي خيرو الله يكمل حملك بخير ويهون عليك الثقل ويعطيك ربي فكاكة ساهلة ماهلة

حبيبه فيروزه شي طبيعي مع هاذ الجو مره يكوم بارد ومره الصهد وخاصه الى كتخدمي الكليماتيزور كيضر فالراس هاذشي لي واقع لي هاذ الايام الصهد بزاف وكنعس فيه والصباح نفيق مدكدكه والراس بغا يتفركع غير ملي تعسي سدي وذنيك بالقطن لان منهم كيدخل برد للراس ولباس عليك احبيبه وماتشوفين شر

على سلامتك حبيبتي عيون لمها الله لا يوريك باس راه خرج علي تدواش فرمضان هههههههه

لابس عليك اختي مايكون غير من صيام اختي لابس عليك بيزووووووو

حبيبة الصيام ونقص السوائل هوا السبب الرئيسي لصداع الراس انا العام الي فات حتى خديت ابرة عاد فاتني مشيت للطوارئ من سبة الم الراس
عليك بالماء شربي الماء والسوائل بزاف والا قدرتي تلقاي لمخينزة ما نعرف اشنو تسميوها في قنيطرة راها غزااالة للصهد والسخانة والا ما لقيتيها جيبي السلاوي نجريه وخدي النجارة ديالة عصريها بين ايديك ممكن طلع ليك غير معيلقة شربيها وديري النجارة فوق راسك وحزميها وتفكريني راها رحمة الله خصوصا الا كنتي كتبقاي في الكوزينة بزاف ديريها وانتي كطيبي
الله يشافيك ويخليك لوليداتك تهلاي في راسك

آمال حبيبة شكرا بزاف فكرتيني فلمخينزة الله يفكرك فالشهادة غير قريت ردك البارح مشيت جبتها عند لعطار كارمة حيث مموجوداش دابا خضرة ودرتها مع العناصر الأخرى ولبختها لراسي وليت بحال شوافات جامع الفنا هههههه ولكن برد علي راسي ونعست مرتاحة الله يعطيك مانويتي فخاطرك وينصرك على من عاداك ويجعلها فميزان حسناتك يارب

حبيبتي الله يشافيك ياربي ويخليلك وليداتك وتشوفيهم فأحسن المراتب وأعلى الدرجات ياربي
كيف كتحسي دابا الى بغيتي المخينزة خضراء نصيفطها ليك مع الكار احبي راني غير فسلا توصلك باقا فريش ردي عليا الى باقا عيانة غدا نصيفطها ليك مايكون عندك باس احبي

ربي يخلليك حبيبتي ناتي ويحفظ جنينك يارب والله حتى وليت لاباس نحمد ربي ونشكرو مبخلتوش علي بمسعداتكم ودعواتكم راكم فعلا أخوات وعزيزات على قلبي

hamdolah 3la slamtak a zin

الحمد لله فيروزتي على شفائك و الله يبعد عليك الامراض و الهموم ..

الف الحمد لله عالسلامة

حمدي الله على سلامتك حبيبه والله يبعد عليك كل مكروه

الله يسلمكم ألبنات شكرا ليكم ولفضل كيرجع ليكم ولمسعادتكم لي كنشكركم من كل قلبي وغنحط فقسم المجربات لوصفات بجوج اللي فادوني فبرد وصداع الراس ربما يفيد شي عضوة الله يبعد عليكم الآلام يارب

ما يكون عندك باس الحبيبة لو كنتي قريبة كنت صيفطتها ليك عندنا خضرا شبعت فيها بعدا هاد العام ما نشرب الحسوة الا بيها جدا جدا مفيييدة وشربي الماء بزاااااااااااف نقص السوائل الي تيدير الم في الراس

الله يشوف من حالك وحالنا جميع الفيروزه راكي عزيزه وليك مكانتك فقلوبنا واش خبار الوليد عل ربي تكون ايامنا كلها فرح ويفرحنا بوليداتنا كاملات اللهم امين