مساعدة عاجلة ..........

بلا متضحكو عليا ...
انا معنديش مع شغال الكوزينة بالمرة لكن هدا مكيمنعش انو عندي شي بركة قليلة ..متوصلش طبعا للحادقات ديالنا ..
كل مرة غنبقا نسولكم على شي حاجة كتجيني صعيبة او مكتصدقش في يدي ..
اليوم غنسولكم على الكسكس
كناخد هداك ديال الكيلو كل مرة و اشمن ماركة ..
ملي كنفتلو متيجينيش بحال ديال الناس ..يكيكون مجموع شوية او قاصح او ......
و الخضرة بغيت نعرف كفاش تبقا ليا الخضرة شادة في الوانها و نقدر نزوق بيها كيف بغيت ..
انا صراحة مكنسولش الناس لي تنعرف كنخاف يضحكو عليا
و لكن راه كسكس ديالي تيجي بنين و لديد ...
انما بغيتو يكون في المرتبة الاولى عند راجلي

يا ريت تعطيوني طريقتكم الخاصة في تجهيز الكسكس

غنجاوبك أنا الاولى هههههه كسكسو فالحقيقة ليه مذاق خاص ولعطتيه لخاطر كيجي رائع أنا فالأول كنت كنفتلو بيدي شوية دخلني لعكز وليت كنشري ديال لبكية وكنرتاح لنوع واحد هو داري المتوسط وكنفضل نهار الجمعة نفيق بكري ونرد كسكسو فالبرمة احسن من طياب الكوكوت كنرد اللحم يطيب هو الأول مع جوج مطيشات مقطعين و جوج بصلات كبار جوانح والزيت والملح والبزار والخرقوم ونخلليه يطيب شي ربع ساعة عاد كنزيد عليه اللفت البيض ولصفر والكرمب وخيزو والحمص مرقد ولا آلفول لكان وقتو وفنفس الوقت كنكون درت الكسكسو فالقصرية وكنرشو بالما حتى يفزك ومرة مرة كنحركو باش ميلصق حتى ينشف وكندهنو بالزيت ونديرو فالكسكاس يفور ومللي يفور كنحطو فالقصرية بكسكاسو ونخوي عليه لما ونخلليه يتسقطر وعاد نخويه فلقصرية ونخليه ينشف شوية ثم كندهنو بالزيت وندير لملح وكيكتكون لخضر اللي فالبرمة قربت تطيب كنزيد عليها الكرعة الحمرة والخضرة وفلفلة حارة وقبطة الربيع صاينة وكنزيد شوية لبزار وندير لكسكاس ونخلليهم يطيبو مزيان صافي وكتقدميه بالصحة والراحة

ومتبقايش تقولي غضحكو علي راه كلنا كنتعلمو مرة على مرة شي مرة يجي مزيان ومرات لا حتى كتحفظي الوصفة مزيان وطوع فيديك

على فكرة أنا دوك لمكعبات ديال كنور بكل أنواعو مكنستعملهمش كلشي طبيعي بغيتي تزيدي السمن فالمرقة زيدي نص معيلقة ويكون طبيعي كيعطي نكهة خاصة فكسكسو
وأي حاجة حنا هنا سولي كيف بغيتي واللي جات فبالك طرحيها هنا

شكرا ليك حبيبتي ...
انا قلت متضحكوش عليا حيت كاين لي تيستهزا بالواحد و موجودين عندي ...
طريقتك مغايرة على طريقتي ...
واش مكتديريش السمن في المرة التالتة في السميد ماشي في المرقة ..

حبيبتي موهيرة هادو اللي كيستهزؤو زادو من كرش مواتهم معلمات؟ المخيرة فيهم متعرف تلوي حتى مسمنة هي الاخرى

السمن مكنديروش فكسكسو كتجي النسمة مجهدة وكدلك كنحتاج ندير صيكوك بلبينة ههههههه
كنديرو فلمرقة كيجي بنين بالتجربة

تبارك الله على الحادكة فيروزة حتى انا ما تنتحاملش مع الكوزينة ويمكن زوج اولا ثلاثة المرات اللي صوبت فيها كسكسو ماما مسكينة هي اللي كتصاوبو شكرا الزين

شكرا حبيبتي الفيروزة..

انا تاندير تقريبا نفس الشيء
اللي مختالف هو تانزيد شوية حليب عند لحطان
كسكس تانغسلو بلما فوسط لقصرية تايشرب مزيان، تان نسقطرو مزيان ونهويه بديا باش مايتعجنش عاد تاندير ليه الزيت و لملح